కలగూరగంప

సాల్ట్ లేక్ సిటీకి వచ్చేసాను. ఇక్కడ కి వచ్చాక భారతదేశంలో enjoy  చేసినంత ఎంజాయ్ చేస్తానో లేదో తెలియదు కానీ, ఆ తెలుగుదనాన్ని ఆ భారతీయతని కచ్చితంగా మిస్ అవుతాను. ఏవో గతంలోవే గుర్తు చేసుకుని ఈ టపావళి (బ్లాగు) ని నడిపించాలి. సరే, ఇప్పుడు జాగ్రత్తగా కూర్చి  టపలు వ్రాయడం అంటే చాలా కష్టం. అందుకే గుర్తు వచ్చింది వచ్చినట్టు వ్రాసేయ్యాలి అని నిర్ణయించుకున్నాను.

% మన  తరం అమ్మాయిలు అందరికీ అభిమానకథానాయకుడు అంటే నాగార్జున. ఒక సారి ఒకమ్మాయి నాగార్జున గురించి పొగడటం మొదలెట్టి, "అసలు మణిరత్నం అంతటి డైరెక్టర్ తమిళ్ హీరోస్ అందరినీ వదిలేసి మరీ తెలుగులో నాగార్జున ని పెట్టి గీతాంజలి సినిమా తీసాడు అంటే, నాగార్జున గొప్పదనం తెలుసుకోవచ్చు", అంది. వెంటనే పక్కన ఉన్న ఫ్రెండ్, "అది కాదు సంగతి. మొత్తం ఇండియా అంతా వెతికినా కాన్సర్ పేషెంట్ లాగా ఉండే హీరో ఎక్కడా కనబడి ఉండడు. అందుకే వాడినే హీరోగా ఎంచుకుని ఉంటాడు. అలాంటి మొహాన్ని కూడా చూసి పరవశించే ప్రజలు ఆంధ్ర లో తప్ప ఎక్కడా ఉండరు అని ఫిక్స్ అయ్యే తెలుగులో సినిమా తీసి ఉంటాడు", అన్నాడు.

% శ్రీ రామదాసు సినిమా విడుదల అయిన కొత్తల్లో మా అన్నయ్య, "శ్రీ రామదాసు క్యారెక్టర్ కి నాగార్జున కరెక్ట్ రా", అన్నాడు. నేను వెంటనే ఆశ్చర్యపోయాను. ఎందుకు అంటే, నాగార్జున action సంగతి ఎలాగ ఉన్న, dialogue delivery చూస్తె చెవుల్లో yorker delivery పడినంత నొప్పి కలుగుతుంది. నా మొహం చూసి తను మళ్ళీ, "రామదాసు పాటలు కూడా వీడికి తగ్గట్టు - ఎక్కడా ఒత్తులు ఉండవు, 'పలుకే బంగారమాయెనా, కోదండపాణి', చూడు, ఒక్క ఒత్తు లేదు. ఫ, భ, ఘ లాంటి ఘనమైన అక్షరాలు కూడా లేవు", అన్నాడు. నిజమే అనిపించింది. నాగార్జున భక్తులను బక్తుల గానూ, భగవంతుణ్ణి బగవంతుడి గానూ, శాస్త్రాలను షాస్త్రాలు గానూ మార్చేస్తుంటే విని మూర్చబోయిన వాళ్ళల్లో నేను కూడా ఉన్నాను.

% మా బంధువు పెళ్ళిచూపులకి వెళ్తే అక్కడ పెళ్లి కూతురు "స్వప్న వేణువేదో", అనే సినిమా పాట పాడింది. శంకర శాస్త్రి కి sub-junior లాగా ఉండే మా బంధువు నవ్వుకుని వచ్చేసాడు. మొత్తానికి పెళ్లి అయ్యింది. ఆ తరువాత నేను కలిసినప్పుడు ఆవిణ్ణి అడిగాను, "మరీ ఆ పాట పాడమని ఎవరు సలహా ఇచ్చారు?", అని. దానికి ఆమె, "అదేంటి సందీపు అలాగంటావు? నేను ఐతే 'దాయి దాయి దామ్మ' పాట పాడదాము అనుకున్నాను, తెలుసునా? ఆ పాట పాడుంటే ఏమయ్యేది అంటావు?", అంది. వెంటనే నేను, "ఆ ఏముంది, ఈ పాటికి నేను నీ బదులు ఇంకో అమ్మాయి తో మాట్లాడుతూ ఉండేవాడిని", అన్నాను.

% ఆవిడే ఇంకో సారి నా స్నేహితురాళ్ళని చూసి, "సందీపు, నేను కూడా జీన్సుపాంటు వేసుకుంటే ఎలాగుంటుంది అంటావు?", అంది. వెంటనే నేను, "మీ నాన్నగారు ఒప్పుకుంటారో లేదో", అన్నాను. "అదేంటి, మా వారు ఒప్పుకోవాలి కానీ,మా నాన్న ఎందుకు ఒప్పుకోవాలి", అంది. నేను, "మీ వారు ఎలాగూ ఒప్పుకోరు. నిన్ను తీసుకెళ్ళి పుట్టింట్లో అప్పగిస్తాడు. అప్పుడు మీ నాన్నగారే కదా ఒప్పుకోవాలి", అన్నాను.