తొలిప్రేమ

తొలకరి జల్లుల తోణికిసలా పుట్టావే తొలిప్రేమ
అలసిన మనసుల అలజడిగా మిగిలావెందుకనమ్మ?
చెలిమి లేని లోటు తెలిపి, కలల నడుమకు నడిపావే
మనసులోని లోతు చూపి, చీకటింట వదిలావు!
చెదరని కథవై, వదలని వ్యధవైనావే...

అడగకనే అతిథిగ నా మది ముంగిట నిలిచావు కదా
కడలివలె ఎగసిపడే పసి ఈడును ఆపావు కదా
మరులు రేపి, మాయ చేసి, హాయి తీరం చూపావు
నదిని దాటి చేరబోతే, నిజము నివురని చెప్పావు
పగిలిన మనసున రగిలే చితివైనావే

కలతలకే కనబడని కనులకు కలలను చూపావు
విధి తెలిపి ఆ కనులే కలతకు నెలవుగ చేసావు
బాధజ్వాల వేడి తాకి, ఆశ ఆవిరి అవుతోంది
ఆవిరైన భావమంతా, కంటనీరుగ కారింది
కనులే కడలై కలలే అలలైనాయే